മണ്ടൻ കുട്ടൻ

-ബാലകൃഷ്ണൻ മൊകേരി

കുട്ടൻ നട്ടൊരു ചെടിയിൽനിറയേ

കുഞ്ഞുസുമങ്ങള്‍ വിരിഞ്ഞൂ,

പൂവുകളവയോ കായകളായി-

പ്പതിയേ മാറുകയായീ,

പച്ചനിറത്തിൽ ചെടിയിൽനിറയെ

കൊച്ചുഫലങ്ങള്‍ നിറഞ്ഞൂ,

കായകള്‍ വേഗം ചോന്നുപഴുക്കാൻ

കാവൽനിന്നൂ കൊതിയൻ !

പച്ചനിറം പോ,യവയിൽ നിറയെ-

ച്ചോപ്പു പടര്‍ന്നുകഴിഞ്ഞൂ !

പറവകള്‍ വന്നൂ,തീനുതുടങ്ങീ,

പലവുരുകണ്ടൂ കുട്ടൻ

ചെടിയുടെചാരത്തോടിയണഞ്ഞൂ,

ചോന്ന പഴങ്ങള്‍ പറിച്ചൂ,

കൊതിയോടവനതു വായിൽവച്ചൂ,

ചതിയതുപറ്റീ, പാവം!

വായെരിയുന്നൂ, കുട്ടനു കൺകളു ,-

മവനുടെ കൈകള്‍ പോലും !

പക്ഷികള്‍ തിന്നുന്നതുകണ്ടിട്ടവ-

നൊരു മുളകത്രേ തിന്നൂ !

എരിപൊരികേറി , വളപ്പിൽക്കൂടി-

പ്പായുകയാണത ,മണ്ടൻ !

............................................

 

വൈപരീത്യം (കഥ)

ബാലകൃഷ്ണൻ മൊകേരി

ഭക്ഷ്യപേയാദികള്‍ വെടിപ്പായി കഴിഞ്ഞ് യോഗാസനംപൂണ്ട ഗുരുവിനെ മയിൽപ്പീലിയാൽ വീശുകയായിരുന്നു ശിഷ്യൻ.അയാള്‍, ഇപ്രകാരം ചോദിച്ചു,

: ഇവന്റെ ഒരു സംശയമുണര്‍ത്തട്ടെയോ സ്വാമിൻ ?

നെറുകയിൽനിന്ന് കൃഷ്ണമണിയിണകളെ കൺകളിലേക്ക് തിരിച്ചുകൊണ്ടുവന്ന്, വാത്സല്യത്തോടെ ശിഷ്യനെനോക്കിയശേഷം, ചോദിച്ചോളൂ എന്ന മുദ്രകാണിച്ചു ഗുരു.

ശിഷ്യൻ ചോദിച്ചു :

രാജഭരണത്തിനെതിരെ സായുധകലാപംനടത്തിയല്ലേ വിപ്ലവകാരികള്‍ ജനാധിപത്യം കൊണ്ടുവന്നത് ?

ഗുരു മന്ദഹാസത്തോടെ മൊഴിഞ്ഞു:

അപ്രകാരമാണ് ചരിത്രം സൂചനതരുന്നത്.

ശിഷ്യൻ : രാജഭരണത്തിന്റെ സകലമാന ഫാസിസ്റ്റ് പ്രവണതകളേയും എതിര്‍ത്തവരല്ലേ അവര്‍?

ഗുരു : ആണെന്നതിന് തെളിവുകളുണ്ട്.

ശിഷ്യൻ : എന്നിട്ടുമെന്താണ് ഗുരോ,ഈ ജനകീയ വിപ്ലവകാരികള്‍ രാജകീയസുഖഭോഗങ്ങള്‍ക്കായി മത്സരിക്കുന്നത്? എന്തുകൊണ്ടാണവര്‍ ആളുകള്‍ക്ക് പേരിന്റെകുടെ രാജകുമാരൻ,രാജകുമാരി,റാണി മുതയായ വിശേഷണങ്ങള്‍ ചാര്‍ത്തിക്കൊടുക്കുന്നത് ? ആ വിളിപ്പേരുകളിലവര്‍ അഭിരമിക്കുന്നത് ?

ഗുരു : ച്ചാൽ? വിശദമാക്കൂ

ശിഷ്യൻ : ക്രീസിലെ രാജകുമാരൻ, നര്‍ത്തനറാണി മുതലായ.....

ഗുരു : (മന്ദഹസിക്കുന്നു) തങ്ങള്‍ ആരാധിക്കുന്നവരുടെ സവിശേഷതകള്‍ അനുകരിക്കാനുള്ള പ്രവണതപോലെതന്നെ,ശത്രുക്കളെയും, നിരന്തരം ഓര്‍ക്കാനും അവരുടെ പ്രത്യകതകളിൽ തനിക്ക് അനുകൂലനംനേടാനുമുള്ള ഒരു ഗുപ്തവൈഭവംകൂടി ആളുകളിൽ പ്രവര്‍ത്തിച്ചുകൊണ്ടിരിക്കുന്നുണ്ട്. ഇതാണ് ആ വൈപരീത്യത്തിന് ഹേതുവായിരിക്കുന്നത്.

ഇത്രയുംപറഞ്ഞാറെ, ഗുരു യോഗനിദ്രയിലമരുകയും,ഗുരുവിന്റെ വിശദീകരണംകേട്ട ശിഷ്യൻ, മയിൽപ്പീലിവിശറികൊണ്ട് ഗുരുവിനെ വീണ്ടും വീശുവാനാരംഭിക്കയും ചെയ്തു.

................................................................